စားနပ်ရိက္ခာဖူလုံရေးနှင့် လယ်ယာစိုက်ပျိုးရေးလုပ်ငန်းများ

ဧရာဝတီမြစ်ဝကျွန်းပေါ်ဒေသများ၌ လူနေမှုဘ၀ကိုအခြေခံ၍ စားနပ်ရိက္ခာဖူလုံရေးနှင့် လယ်ယာစိုက်ပျိုးရေးလုပ် ငန်းများ ပြန်လည်ထူထောင်ရေးအတွက် မြန်မာနိုင်ငံရှိ ကုလသမဂ္ဂစားနပ်ရိက္ခာနှင့် ဂျပန်နိုင်ငံ အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA)တို့အကြား သဘောတူစာချုပ် လက်မှတ်ရေး ထိုးပွဲအခမ်းအနားကို ယမန်နေ့ နံနက် ၁၀နာရီက ရန်ကုန်မြို့ ကမ္ဘာအေးစေတီလမ်းရှိ ဆီဒိုးနားဟိုတယ်၌ ကျင်းပ သည်။
လက်မှတ်ရေးထိုးပွဲအခမ်းအနားတွင် လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန ၀န်ကြီးဗိုလ်ချုပ်ဌေးဦး ပြည်ထောင်စု မြန်မာနိုင်ငံတော်ဆိုင်ရာ ဂျပန်နိုင်ငံသံအမတ်ကြီး H.E.Mr Yasuaki Nogawaဂျပန်နိုင်ငံ အပြည်ပြည်ဆိုင်ရာပူးပေါင်းဆောင်ရွက်ရေးအေဂျင်စီ ဌာနေကိုယ်စားလှယ် Mr.Hideo Miyamoto နှင့် ကုလသမဂ္ဂစားနပ်ရိက္ခာနှင့် စိုက်ပျိုးရေးအဖွဲ့မြန်မာနိုင်ငံ ဌာနေကိုယ်စားလှယ် Dr.Shin Imai တို့က အမှာစကားပြောကြားသည်။
လက်မှတ်ရေးထိုး
ထို့နောက် ဂျပန်နိုင်ငံ အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ ဌာနေကိုယ်စားလှယ်နှင့် စိုက်ပျိုးရေးအဖွဲ့မြန်မာနိုင်ငံ ဌာနေကိုယ်စားလှယ်တို့က သဘောတူ စာချုပ်ကို လက်မှတ်ရေးထိုးကြသည်။
လှူဒါန်း
အဆိုပါ သဘောတူစာချုပ်အရ ဂျပန်နိုင်ငံ အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီက နာဂစ်မုန်တိုင်းဒဏ်ခံခဲ့ရသည့် ဧရာဝတီတိုင်း ငပုတော၊ လပွတ္တာ၊ မော်လမြိုင်ကျွန်းနှင့် ဘိုကလေးမြို့နယ်တို့၌ လူနေမှုဘ၀ကိုအခြေခံ၍ စားနပ်ရိက္ခာဖူလုံရေးနှင့် လယ်ယာစိုက်ပျိုးရေးလုပ်ငန်းများ ပြန်လည်ထူထောင်ရေး အတွက် ဂျပန်ယန်း သန်း၂၀၀ လှူဒါန်းမည်ဖြစ်ကြောင်း သတင်းရရှိသည်။